Reportajes

Reportaje sobre Tarbut Sefarad en «El Amaneser»

«UN PROYECTO POR EL RETORNO DE LA KULTURA SEFARDI A SU KUNA»
EL AMANESER  I  Nº 33. 7 Noviembre 2007.


Descargar el artículo

 

  Texto del artículo publicado en El Amaneser    

 AKTUALIDADES

ROZ KOHEN DROHOBYCZER/
ST. LOUIS, MO, USA
rozkohen@gmail corn

Es en el anyo 2005 ke Mario Saban i Matilde Rufach fondaron en Lerida, Espanya, el Departamento de la Pensada Ebrea, en la Universidad de Lleida kon el apoyo del Padre Jesus Sanz. Fueron asistidos en este proyekto por UNESCO i la Fondasion UDL (Universidad de Lerida dirijida por el Dr. Joan Busketa).

En el anyo 2006 el kurso empeso kon 70 alummos, todos kristianos ke dezeavan konoser la kultura djudia. Este mismo anyo, en el mez de oktubre, un grupo de personas fondaron en Lerida, la Asosiasion TARBUT-LLEIDA, teniendo por buto la difuzion de la kultura ebrea. En el anyo 2007, se desidio de anchear la ekperiensa de Lerida a toda la Espanya.

En muestros diyas, Mario Saban, en tanto ke el Prezidente de la Asosiasion TARBUT SEFARAD, ovra kon Lina Cami, Malka Gonzalez Bayo i Matilde Rufach para estableser kontaktos kon todos los akadernisianos, redaktores i estudiantes en el domeno del DJudaismo en el mundo, para invitarlos a Espanya a prezentar kursos i konferensias, i para asistir a estas aktividades. Aparte de esto, TARBUT SEFARAD pensa organizar kada anyo una feria del livro djudio en Espanya.

El buto de Tarbut Sefarad es de ser unidos por un mismo ideal: tornar a arebivir la kultura sefaradi en Sefarad, la tierra ande nasio.
Komo savrash, Tarbut Sefarad kere dizir 'la Kultura Sefaradi' en Ebreo.

Ansi se eksprime Mario Saban sovre sus proprias raizes:
“Mi padre David Saban nasio en Izmir. Mis avuelos paternales son Meir Saban (1898-1981), nasido en Magnesia (Manisa) i Rebeca Arditi nasida en lzmir. Los Sabanes eran desendientes de las famyas Alazraki i Nahoum de Magnesia i los Arditis eran desendientes de las famiyas Chicurel i Strugo de lzmir.

Mi madre Violeta Kunyo nasio en Buenos Aires. Sus kuatro bisavuelos son de lzmir, de las famiyas Bitran, Kalachi, Benveniste, Levi, Saul, Kohen, Karmona i otras”.

Mario Saban nasio en Buenos Aires. Antes 20 anyos empeso a estudiar el tema de la Inkizision en Amerika. Su primer livro Judíos Conversos es una investigasion sovre los antepasados de los Djudios portugezes de las mas viejas famiyas de Arjentina. Empesando del anyo 2002, rezide en Barselona. Es ayi ke enkontro a la Dra Malka Gonzalez Bayo, i empesaron a ovrar endjuntos kuatro anyos antes para realizar el proyekto de krear en Espanya, una koneksion kultural del Djudaizmo.

Mario Saban pensa ke, mismo ke munchos Sefaradim dispersados en el mundo, no konosen bastante a Sefarad ke kere dizir Espanya en Ebreo, los DJudios de la Diaspora Sefardi kontinuan a konservar una identidad komun ke se retrasa a la Espanya, ande bivieron durante siglos enteros. Entonses, una koneksion entre los Djudeo-Espanyoles, en las sivdades antiguas de la Espanva ande bivieron durante siglos, puedra ser la baza por un arebivimiento de sus patrimonyo i de sus integrasion.

Konsernando el patrimonyo djudio i el proyekto Tarbut Sefarad, Mario Saban se eksprime ansi:

'Estamos orgolyozos de ser los kreadores del monoteismo ke dio lugar al nasimiento del Kristianismo i del Islam. La istoria umana no puede ser estudiada sin el Djudaismo. Estamos luchando por la realizasion de la utopia mesianika de la unyon de todos los puevlos en la paz, asigun ke proklamaron muestros profetos. Muestro objektivo es de yegar a las 100 sivdades en el redo de la kultura djudia. Tenemos detras muestra fuersa de varios milenios de istoria.

Estamos orgolyozos de alevantar la bandiera del puevlo djudio en Evropa despues de la Shoa. Estamos orgolyozos del movimiento sionisto ke kreo las bazas fundamentales de muestro aktual Estado de Israel”.

De mismo, estas palavras por Rafael Cámara, presidente de Tarbut Jaén, son sinyifikantes:

“El proyekto de Tarbut Sefarad es para mozotros una oportunidad unika i istorika, para pueder aunar esforsos, kompartir eksperiensas i bushkar solusiones kondjuntas a tantas kestiones ke surjisen en el dover de rekonstruir la memoria ispano ebrea.
Muestro pretension es muy grande. Tenemos de difuzar el Djudaismo i la kultura ebrea en akeyas rejiones i puevlos ainda dominados por la mentalidad inkizitonal i la intolerensia ke bivio en este payis durante sienes de anyos”.


Pensamos ke la idea de konektar i arebivir la pensada djudia en Espanya, ke fue la kuna del Djudaismo sefardi, es una idea ke se adapta a la realidad istorika i aktual.

A muestro avizo, si el proyekto de TARBUT SEFARAD puedria en mizmo tiempo abrasar los desendientes de los konversos, aparte de ser uniko, este proyekto sera i muncho mas integrativo.

Todo en suetando reushidad a TARBUT SEFARAD, keremos terminar kon estos biervos de Mario Saban:
“Somos el puevlo del Livro i por esta razon estamos orgolyozos de tornar a arebivir i engrandeser la kultura djudia en la tierra de Maimonides”