Tribuna

Letra de Grasias a Tarbut Sefarad

Carta de agradecimiento de Rachel Amado tras su gira de conferencias por Sefarad.

 Estimados amigos de Tarbut Sefarad, i en partikolar Mario Saban i las personas mensionadas en esta letra:

Durante mi viaje en Espanya, del 24 Marso al 17 Avril 2008, yo estuve mandando emails a los miembros de Ladinokomunita kaji kada dia, deskriviendo en kurto ande estuvimos (yo i mi marido Bernard), lo ke vimos, i lo ke paso en kada lugar. En todo vijitimos 16 sivdades, i yo di konferensias en 10 de eyas.

Mi ultimo mesaje, eskrito en el avion en kamino de Espanya a l’Amerika, el 17 Avril, 2008, inkluyia estos biervos:
 
“Me demando: komo viene ser ke todo lo ke paso en mi vida desde el 24 Marso paso alientro de solo 25 dias? Ni en mis esfuenyos yo no me podia imajinar un viaje semejante. Ma una persona se lo imajino, i alientro de pokos mezes, lo realizo! Esto es el savio mansevo Mario Saban, ke fondo el Tarbut Sefarad en Espanya de la mizma manera. Imajinarlo i realizarlo, komo ke si no uviera koza mas natural i mas fasil de azer en el mundo!”

 
Dainda penso i siempre pensare lo mezmo.
 
Ke suerte ke tuve yo ke Mario oyo mi nombre, i sin konoserme personalmente, me envito a azer este tur de konferensias en Espanya al nombre de Tarbut Sefarad! I ke plazer i alegria, para mi i Bernard, de finalmente azer su konosensia en persona! Mario Saban es un mansevo ekstraordinaryo, amable i umilde malgrado su grande entelijensia i saviduria. I, ademas, yo tengo kon el una koneksion Sefaradi kon raises en Izmir, Turkia, ande nasio su papa, i yo tambien. Sus avuelos, antes de irsen a Buenos Aires en 1950, moravan enfrente de muestra kaza, i yo me akodro de eyos i de sus famiya komo si fuera oy, sovre todo porke su tia Alegra (ermana de su papa) era amiga mia i kamarada de klasa en la eskola! I kuando me topi en la kaza de Mario djuntos kon su amable famiya, me sinti verdadmente komo ke esto kon mi famiya propria! Grasias, kerido Mario, por todo.
 
Envitarme es una koza, ma organizar todos los detalyos lojistikos de mis konferensias en varias sivdades es muy grande lavoro. I en este lavoro Mario tuvo su ayudante prinsipal, su “mano derecha” ke es la infatigable i simpatika organizadora par excellence, Lina Cami. Eya preparo todo, estuvo siempre en kontakto kon mi via email antes de muestra yegada, ayudo a Bernard kon los detalyos de transporto alientro de Espanya, i mos presento kon una sorpreza maraviyoza kuando yegimos a Barselona – un ermozo livro ke mos sirvio komo muestra biblia en kada momento de muestro viaje, porke kontenia todos los detalios de muestro tur: una oja por kada dia, indikando en ke sivdad ivamos a estar, ken mos iva resivir, en ke otel mos ivamos a kedar, numeros de telefon de kontaktos, i mas. I aparte de esto, Lina izo unos “markalivros” artistikos kon mi programa kompleto de konferensias, para dar a los asistientes en las konferensias. Va tomar muncho espasio de kontar todo lo ke mos izo para ayudarmos Lina Cami, todo kon su kara luzia i sonriente. Eya va ser mi kerida amiga por siempre.
 
Otra kolaboradora de Mario ke mos resivyo i mos ayudo, tambien siempre kon su kara simpatika i sonriente, es Matilde Rufach, ke, entre otros, organizo mi konferensia en Lleida (Lerida.) Malorozamente, en preparando de vinir a resivirmos kon Lina al aeroporto de Barcelona, Matilde tuvo un aksidente de oto (koche) ke la desho inkapasitada por un sierto tiempo. Fue mi grande plazer de verla, aun kon su baston i kosheando, en la konferensia en Lleida el 1 Avril, i despues, bien sanada, en el otel de Barcelona, djuntos kon Lina, el dia antes de muestra partida.
 
La reushita de mi vijita fue el resultado de una lavor, kolaborasion, i dedikasion imensa de munchos miembros de Tarbut Sefarad i otros. Eyos aparejaron el otel i el salon de konferensia en sus sivdades, enformaron a la prensa, la radio, i/o television, i izieron otras publisidades, i eyos fueron mustros giyas turistikas. En kada sivdad ke vijitimos, fuimos resividos i bienvenidos kon grande amistad i atension por eyos. Sin dar mas detalios de todo lo ke kada uno izo por mozotros, los kero rengrasiar a eyos, i espesialmente a:
 
Rafael Cámara, Eduardo J. Ruiz (Jaen, 26 Marso.)
Dra. Julia Behar (mi prima), Dra.Pilar Romeu, Rita Cesana de Tevah, Nuria Guasch, i los otros mensionados en Barselona (varias datas.)
Fransesc Grabolosa (Besalu, 29 Marso.)
Angel Miranda, Padre Jesus Sans, Matilde Rufach (Lleida, 1 Avril.)
Felipe Cambra (Tudela i Pamplona, 2-3 Avril.)
Matilda Gini de Barnatan, Viviana Rajel Barnatan, Uriel Macias (Madrid, 4 i 6-7 Avril.)
Doroteo Rubio-Machado (Tomelloso i El Toboso, 5 Avril.)
Ricardo Garcia Seseña, Alcalde Marciano Ortega Molina (El Toboso, 5 Avril.)
Samuel del Coso Román (Toledo, 8 Avril.)
Jacqueline Tobiass (Palma de Mallorca, 10 Avril.)
Francisco Fontana (Valencia, 12 - 13Avril.)
Armando Azubel, Diana Nielander (Alicante, 14-15 Avril.)
 
Tambien mis grasias a todas las sosiedades i associaciones ke kolaboraron kon Tarbut Sefarad para realizar este projeto. Eyos son:
 
Amics de Besalú i el seu Comtat, Associació Call de Barcelona, Comunidad Judía de Madrid, Comunidad Israelita de Barcelona, Amistad Judeo-Cristiana de Valencia, Comunidad Israelita de Valencia, Asociación Cervantina de El Toboso, Excmo. Ayuntamiento de El Toboso, Comunidad Judía de Alicante Centro, la Universidad de Alicante y el Instituto de Relaciones Culturales Baleares - Israel, UNESCO LLeida.
 
Para mi, este viaje fue una eksperiensa, o una seria de eksperiensas, inolvidable! Bernard i yo lo desfrutimos muncho mas de lo ke mos esperavamos. Todos los lugares ke vimos, i todas las personas ke konosimos, desharon una profunda i ermoza empresion en muestros korasones. Ma ademas para mi, esta oportunidad de trayer el mesaje de muestra kultura i estorya Sefaradi a Sefarad, komo una ambasadora de los miembros de Ladinokomunita i de todos los Sefaradim, fue una enorme onor. Los dias i momentos de mi viaje fueron yenos de emosion, akompanyados de las fantasmas del pasado Djudio, i las memorias de luz i de eskuridad en estas tierras. Espero ke la luzizika de vida Djudia ke retorno a siertas sivdades en Espanya oy va briyar i aklareser todo el pais. En esto, no tengo duda ke Tarbut Sefarad tendra un grande rolo.
 
Kon profundo agradesimiento mio i de Bernard, i kon muncha amistad,
 
Rachel Amado Bortnick
(Dallas, Texas, U.S.A.)