Tribuna

En memoria de Israel bar Yehuda

Perla Kata, desde Israel, dedica esta carta a su tío, fallecido en mayo de 2008.

El 27 de mayo falleció un buen amigo de Ladinokomunita y amigo también de Tarbut Sefarad. Con motivo de la visita de Rachel Amado Bortnick a España, Israel nos envió desde Tel Aviv un poema que publicamos en la web: Kada Diya entero el Anyo. Como pequeño homenaje a este amigo, le pedimos a su sobrina, Perla Katan, que nos escribiera unas líneas en su memoria. Ella nos remite esta carta desde Israel, donde vive.

 

Keridos  amigos:

Israel  Bar  Yehuda (15/09/1932 -27/5/2008)  era  un  buen  amigo  de  Ladinokomunita, i  kero  eskrivir  en su  memorya  por  su  vida  para  los  ke  lo  konosieron.  Israel  era  un  primo  ermano  de  mi  mama.  El  era  una  persona  espesial: intelijente,   edukado, ombre  de  famiya   amistozo i kerensiozo kon todos i kon  todo  muy  humilde [modesto].  El  yego  a Israel  antes  60  anyos en  un  vapor  de  kargo kuando el era  un  manseviko  de  15 anyos.  En  Israel el  estudio  en  la  eskola "mikve -israel".  En  terminando  los  estudios el  se  fue  a  la armada  ("tsahal"), estuvo en  ''nahal'noar halusi lohem"  ke sinyifika "juventud  pioneros  gerreadores".  El  se  firio en el  pie, i en sanandose  lo pasaron a Modiin [servisio de  informasiones] i lo enbiaron  a un  kurso de ofisiales superiores i yego  a un  grado  de  "sgan  aluf "  [teniente  koronel] un  grado antes de  gereral. Israel   konfirmo  el  primer  kestionario de  klasifikasion-seguridad i konkrio planos  de  estudios  a arabe-avlantes  en  el  servisio  de  informasion, mientras ke el estuvo  estudiando i adelantandose  en  Israel, i fue  enbiado  a otros  paizes. Despues  de  su  retiro  de  la  armada,   el  lavoro  en  una  de  la  mas  grandes  kompanias  de  Israel  "Konseran  Kur".  El  lavoro  tambien  en Tel-ashomer, el  ospital militario,  en  departamiento  de investigasiones de  enfermeda de  korason .  Despues  de  la  muerte  de Sara, su  mujer,  el  dediko  la  mayor  parte de  su vida  a bushkar  las  raizes  de  la  famiya, i kito a  luz el livro  de  la  famiya ke va a kaje  150  anyos  atras.  El  mezmo partio  asta  Paris a  topar  a  un  ramo  de  la famiya  ke  bivian  aya. El eskrivio unos  livros  basando   en  kuentos  de  su  chikes  i  la de  su  mujer, i  tambien  por  la  enfermeda  de  su  mujer.  Israel  avia  tomado   el  ladino  komo  el projekto  de  su  vida.  El  estuvo estudiando  en  la  universitad  de  Bar  Ilan   el  ladino i izo  investigasiones  de  la  lingua  i  del  kante  ladino.  El  dizia  ke  viejo  es  persona  ke  piedre  la  kuriozita; el  nunka  la  piedrio i  topava  okazion  de  reyir  siempre.  Ansi  ke  el  murio  mansevo.  Su  "alvaya"  [funeral]  fue  una  koza  enkreible  de  la  kantidad  de djente  i  sestos     de  flores de  toda  manera.  Enpesando   de  la  armada i de  ofisinas del  governo, todos avlaron  por  el.  Yo tuve  zehut  [privilegia] de  ser  su  sovrina,  konoserlo i  ser  komo  una  amiga  buena.  Su muerte  me  duele  muncho, i a mi  el me  va  mankar  muncho.  Su  inyeto  en  la  "levaya" disho "Israel  era  persona gereador  i  vensedor,   presonas komo  el azen  a el  mundo  lugar  mijor  para  bivir, persona ke  desho  detras de el   un  "hotam" [sello, estampa]ke  no  se  deskolorara   kon  diezes  de  anyos i  los  kalsados   ke  el desho  siempre  seran  grandes para  ken kerera  tomar  su  lugar.”   

"yehi  zihro  baruh"  - su memoria ke seya bendicha.
 
Perla Katan
de  Israel